Layaabka Dunida: Magaalo Ay Adag Tahay In Xabaalo Looga Helo Dadka Soomaalida Ah Ee Ku Dhinta Iyo Sababta

0
81
Lawadaag Asxaabta...

Magaalada Hyderabad ee dalka Hindiya oo ah magaalo ay ku nool yihiin in ka badan 7 milyan oo qof ayaa waxaa ay ka mid tahay magaalooyinka dadka Soomaalida ahi ay u raadsadaan adeegyada dhanka caafimaadka iyo Waxbarashada. Dadka u raadsada adeegyada caafimaad oo ah kuwo inta badan aan ku qancin adeegyada ay ka helaan dalalka ay ku nool yihiin ee deegaamada Soomaalida, iyo kuwa xaaladooda wax lagaga qaban kari waayay dhulkaasi ayaa waxaa ay miciin bidaan dalal ay ka mid tahay Hindiya, oo qiima ahaan iyo taya ahaanba ay sheegeen inay ka jaban tahay. Weriyaha BBC-da Bashiir Maxamed Caato oo dhawaan safar shaqo ku tegay Hyderabad ayaa halkaasi waxaa uu kula kulmay Dr. Sikandar oo maamule ka ah mid ka mid ah Cisbitaallada sida gaarka loo leeyahay, ayna tagaan Soomaalidu.

Wuxuu sheegay in inta badan bukaanada Soomaalidu ay yimaadaan Hindiya marka ay xaaladoodu faraha ka baxdo, dedaal walba oo ay sameeyaanna aaanu waxba soo kordhinayn. ”Dadka bukaannada ah ee noo yimaada intooda badan waxay qabaan xanuuno ay ka mid yihiin kuwa ku dhaca wadnaha, neerfaha ama dareen-wadayaasha, iyo kansarka, balse waxa ay yimaaddaan xilli aanaan waxba ka qaban karin” waxaa sidaasi BBC-da u sheegay Dr Sikandar.

Dr Sikandar ayaa sidoo kale sheegay in bukaannada qaar ay halkan u yimaadaan xanuuno basiid ah oo ay kamid tahay gaaska iyo isku furanka haweenka, kuwaasoo wax lagaga qaban karo dalalka ay joogaan. Hase yeeshee caqabadda ugu weyn ee ka taagan magaalada Hyderabad ayaa waxaa ay tahay xabaalaha lagu aaso dadka halkaasi ku geeriyooda.

Hyderabad oo ah magaalo aad u cidhiidhi badan, helidda dhulkana ay tahay mid gabaabsi ah ayaa taasi waxaa ay mixnad kale ku noqotay ehelada dadka halkaasi ku geeriyooda.

Dadka qaar ayaa si ay u helaan xabaal ay ku aasaan eheladooda waxaa ay ku bixiyaan kharash aad u badan, halka kuwa kalena ay ku qasbanadaan inay meydka dib ugu soo celiyaan deegaanadooda. Jaaliyadda Soomaalida ee dalka Hindiya ayaa waxa ay sheegeen in caqabad weyn ay ka haysato xabaalaha lagu aaso dadka Hyderabad ku geeriyooda, haatanna ay ka fakarayaan sidii xal loogu heli lahaa mushkiladaasi.

”Waxaa dadka Soomaalida dhaqan u noqotay in qofka Hindiya la keeno iyadoon xaaladdiisa waxba laga qaban karin, Waxaana adag in qofka halkan ku geeriyooda loo helo meel lagu aaso, kuwa loo helana laga bixiyo kharash aad u badan, sababo la xidhiidha dhulka oo gabaabsi ah, waxaana jira dadaalo ay wadaan jaaliyadda Soomaalida oo ku aadan xal u helidda arrintan” sidaasi waxaa BBC-da u sheegay Mustafe Cali oo kamid ah jaaliyadda Soomaalida ee Hindiya.

Marka la eego tirada dadka Soomaalida ee ay ku dhacayaan xanuunada dilaaga ah, iyo qiimaha adeegyada caafimmaadka ee bariga Afrika oo intooda badan anaay awoodin ayaa taasi waxa ay ka dhigan tahay in sannado badan daryeel caafimmaad loo doonan doono dalal ay ka mid tahay Hindiya. Dalal kale ayaa jira oo soomaalidu ku dhib qato sidan.

 

LEAVE A REPLY

Please enter your comment!
Please enter your name here