BREAKING NEWS
Search

Xarunta Xuquuqal Insaanka Oo Walaac Ka Muujisay 24 Oday Oo Sifo Sharci Darro Ah U Xidhan Muddo 5 Bilood Ah — ‘Akhri War-saxaafeed’

Hargeysa (Foore)- Xarunta Xuquuqal Insaanka Somaliland ee fadhigoodu yahay Caasimadda Somaliland ee Hargeysa ayaa waxa ay walaac ka muujisay Xadhigga odayaal 24 tiradoodu dhan tahay oo ay xaruntu ku sheegtay in ay u xidhan yihiin sifo sharci darro ah kuwaasi oo ay xukuumadda ugu baaqday in ay si degdeg ah u sii dayso.
War-saxaafadeed uu ku saxeexan yahay Guddoomiyaha Xarunta Xuquuqal Insaanak Somaliland Garyaqaan Guuleed Axmed Jaamac oo nuqul ka mid ahi wargeyska Foore soo gaadhay ayaa u dhignaa sidan:
“Xarunta Xuquuqal Insaanku waxaay ugu baaqaysaa dawladda Somaliland inay xoriyadooda u soo celiso 24 qof oo xidhan tan iyo 17kii June 2016 iyada oo aan dacwad lagu soo oogin. Afar iyo labaatanka nin waxa laga soo xidhay magaalada Caynabo iyada oo aan loo haysan amar maxkamadeed. Lama horgeyn dadkaas maxkamad islamarkaana wax eed ah oo lagu soo oogay ma jirto. Sideed iyo toban ka mid ahi waxaay ku xidhan yihiin Mandheera halka lixina ku xidhan tahay Caynabo. Waxa ka mid Jiif Caaqil Salaad Yuusuf Qodax, Caaqil Salaad Faarax Yuusuf iyo Caaqil Aadan Salaad Jaamac.
Sida ay noo xaqiijiyeen qoysaskooda iyo ilo kale, odayadan waayeelka ah waxa loo xidhay sabab la xidhiidha nin ay isku qabiil yihiin oo la sheegay inuu ku dilay deegaanka Caynabo nin kale kadibna baxsaday. Looma haysto fal ay ka geysteen dhacdada, balse inay yihiin odayo la reer ah ayay u xidhan yihiin.
Waxa lagu hayaa amarka badhasaabka Saraar, sida loo xaqiijiyay Xarunta. Shuruucda Somaliland ma ogola in badhasaabadu ay dadka u diraan xabsiga. Xarunta Xuquuqal Insaanku waxay 29kii September qoraal codsi ah u qortay wasiirka caddaaladda iyo hay’ado kale oo ay khuseeyso. Wax jawaab ahna kama helin.
Sida ku cad qodobka 25aad ee dastuurka Somaliland qofna xorriyadiisa loogama qaadi karo si aan waafaqsnayn xeerka. Sharcigu wuxuu waajbinayaa in 48 saacadood gudohood lagu horgeeyo maxkamad cidii la soo xidho. Afar iyo labaatan kan qof wax maxkamad ah lama horgeyn mana jirto garsoore xalaaleeyey hayntooda. Qodobka 26aad ee dastuurku wuxuu sheegayaa mas’uuliyadda dembi ciqaabeed waxay ku kooban tahay cidda geysatay oo keliya.
Xarunta Xuquuqal Insaanku waxaay ka codsanaysaa dawlada Somaliland inay xorriyadooda u soo celiso dadkaas xidhan”.
Guleed Axmed Jaamac
Guddoomiyaha Xarunta Xuquuqal Insaanka
Hargeisa Somaliland
Email: hrcsomaliland@gmail.com




Leave a Reply

Your email address will not be published. Required fields are marked *