Search

Dalladda SONSAF Oo Hargeysa Ku Qabatay Kulan Lagaga Hadlayay Diiwaan Gelinta Codbixiyayaasha (Voter Registration)

Waxa Ka Soo Qayb Galay Kulankan, Komishanka Doorashooyinka Qqaranka, Saddexda Xisbi Qaran Iyo Daneeyayaasha Arrimaha Doorashooyinka Somaliland

Hargeysa (Foore)- Fooramka jilayaasha aan dawliga ahayn ee SONSAF ayaa Shalay magaalada Hargeysa ku qabtay dood lagaga hadlay sidii loo hir gelin lahaa diiwaan gelinta codbixiyaasha Somaliland, doorashooyinkuna ku qabsoomi lahaayeen wakhtigii loogu tala galay.
Kulankan ayaa waxa ka soo qayb galay masuuliyiin ka socday saddexda xisbi qaran ee Somaliland, guddoomiyaha gudddida doorashooyinka qaranka, ururada bulshada ee ka qayb galaya hanaanka doorashadu u socoto iyo xubno kale. Gudoomiyaha ururka jilayaasha aan dawliga ahayn ee SONSAF Md. Mustafe Sacad Dhinbiil oo ka hadlay furitaanka kulankan ayaa waxa ka waramay warbixin ay ka soo saareen doorashooyinkii dawladaha hoose ee ka qabsoomay somaliland waxaanu yidhi: “warbixintii aanu ka soo saarnay doorashadii 2012 waxa uu ahaa buug meel walba lagu qaybiyey, maalintii aanu daah furaynay waxaanu ku furnay magaalada Nairobi oo ay joogaan inta badan dhamaan qolyaha inaga caawiya doorashooyinka, mar labaadna waxaanu ku furnay magaalada Hargeysa, in ka badan 2000 buug ayaa la daabacay ilaa imikana wufuud kasta oo caalami ah oo yimaada waa la siiyaa, waxaanay noqotay warbixin dhex dhexaad ah oo ururada bulshadu ku daba galeen nidaamka doorashada.” Gudoomiye ku xigeenka xisbiga Kulmiye Maxamed Kaahin Axmed oo ka hadlay kulanka ayaa soo dhaweeyey ururada bulshada ee ka qayb galaya ilaalinta hawlaha doorashada waxaanu yidhi “Kulankan ujeedadiisu ay tahay sidii ay gogol xaadh ugu noqon lahayd, diyaar garawna ugu noqon lahayd, masuuliyadooda loo tilmaami lahaa ururada bulshadu sidii ay ugu diyaar garoobi lahaayeen ka qayb galka iyo ilaalinta doorashoyinka soo socda, waanu soo dhawaynaynaa.”
Gudoomiyaha xisbiga mucaaridka ah ee Ucid Eng Faysal Cali Waraabe oo ka hadlay kulankan ayaa dhinaciisa sheegay inay muhiim tahay in dadka masuuliyiinta ahi ay dhawraan wixii lagu heshiiyo waxaanu yidhi “Bahasha haddii aynaan dadkeena mudakarka ah ee masuuliyiinta ahi aynaan ilaalin wixii ay qoreen shacabkuna wuu baabiinayaa, ta kale wuu jirayaa kormeer ay samaynayaan ururada bulshadu laakiin awood ma leeyihiin marka ay arkaan wixii oo xumaaday waa inay jirtaa meel dacwadooda qaadaysa oo saamayn leh.” Ayuu yidhi gudoomiye Faysal Cali Waraabe. Sidoo kale La taliyaha siyaasada arimaha dibada ee xisbiga mucaaridka ah ee Waddani Faadumo Siciid Ibraahin oo ka hadashay kulankan ayaa soo dhawaysay ururada bulshada rayidka ah waxaany tidhi “Runtii waxa weeyaan waa loo baahan yahay ururada bulshada waanan soo dhawaynaynaa, laakiin kormeerka aad samaynaysaan waa mid noocee ah, ma wakhtiga doorashada ayaad samaynaysaa, taasna waa in laysla eego, dadka kormeerka galayana waa in la sii tababaro oo guddida doorashooyinka ayaa ku shaqo leh, xisbiyaduna qayb ayey ku leeyihiin waana in laydiin ogaado.”
Ugu danbayntiina Guddoomiyaha Guddida Doorashooyinka Somaliland Cabdiqaadir Iimaan Warsame oo ka hadlay kulankan ayaa sheegayinay muhiin tahay in laga qayb galo sidii diwaan gelinta codbixiyayaasha loo hir gelin lahaa “Waxaynu hada galnay diwaan gelintii taas oo u baahan in loo diyaar garoobo si aynu u galno doorashooyinka ku xige.”




Leave a Reply

Your email address will not be published. Required fields are marked *