Search

Badhasaabka Gabiley Oo Qiray Quudhsigii Saylici Iyo Muuse Kala Kulmeen Liyuu Booliska & Xidhiidh Uu Falkan Kala Sameeyey Madaxweynaha Kililka

“Ciidamada Itoobiya Oo Aan Aqoon U Lahayn Ayaa Si Wada Jira U Joojiyey Madaxdii Somaliland Iyo Dadweynihii Hareera Socday”..M. Shiine

Hargeysa (Foore)- Badhasaabka Gobolka Gabilay Mudane Mustafe Cabdi Ciise (Shiine) ayaa faahfaahin ka bixiyey qaabkii uu u dhacay Ismaan-dhaafkii dhinaca Borotakoolka ahaa ee keenay in Madaxweyne ku xigeenka Somaliland Md. Cabdiraxmaan Cabdilaahi Ismaaciil (Saylici) iyo Guddoomiyaha Xisbiga KULMIYE Md. Muuse Biixi Cabdi ay ka soo cadhoodaan daanta degmada Wajaale ee dhinaca Itoobiya saacadihii lagu guda jiray Aaska Janaasadii Marxuum Axmed Xasan Cawke, isaga oo badhasaabku dhaliilay qaabka warbaahintu u fasirtay dhacdadaasi.
Mustafe Cabdi Ciise oo loo yaqaano Shiine, Badhasaabka Gobolka Gabiley waxa uu ka warramayaa xidhiidh toos ah oo dhex maray isaga iyo Madaxweynaha Kililka Shanaad Mudane Cabdi Maxamuud Cumar (Ina Ilay) kaasi oo ku saabsanaa falkii Saylici iyo Muuse kala kulmeen ciidamada Ammaanka Kililka Shanaad ee dalka Itoobiya oo lagu sheegay in uu ahaa mid waji gabax ku noqday masuuliyiintan oo qaabka loola dhaqmay ka cadhooday.
Badhasaabka Gobolka Gabilay Mustafe Cabdi Ciise (Shiine) oo arrinkaasi ka warramayaa waxa uu qoraal kooban oo uu soo galiyey Facbook ku yidhi sidan: “Waxa wax laga xumaado ah in warbaahinta Somaliland ay qaarkood faafinayaan warar aan faa’iido laga gaadhayn wax xiiso iyo qiimo ahna aan u lahayn shacabka reer Somaliland iyo Dawladda aynu jaarka nahay ee Ethiopia, taasi oo ay sawir khaldan ka bixinayaan dhacdo shalay ka dhacday xabaashii Marxuum Axmed Xassan Cawke oo hayd sidan:- Waxa kolkii laga soo baxay salaadii jinaasada u soo dhaqaaqay dhinaca xabaasha oo uu markaa nagu soo gaadhay madaxweynahaa DDIS Cabdi Maxamed Cumar, taasi oo keentay in ciidamada Ethiopia ay amaanka adkeeyaan, waxoogaa kadib ayaa waxa dhankii salaadii jinaasada ka yimid Madaxweyne xigeenka JSL Md Cabdiraxmaan Cabdilaahi Saylici iyo Gudoomiyaha xisbilxaakimka Md Muuse Biixi oo ay daba iyo hareera socdeen kumanaan dadweyne ah, kuwaasi oo ay ciidamada amniga oon aqoon u lahayn si wada jira u joojiyeen madaxdii Somaliland iyo dadweynihii mawjadaha ahaa ee hareera iyo daba socday, waxaana ay keentay in masuuliyiinta reer Somaliland oo danaynaya amaanka ay u dhaqaaqaan dhinaca gaadiidkooda uma tallaabaan dhinaca Somaliland.
Markii warkaasi na soo gaadhay waxa aniga iyo Wasiirka Cadaalada JSL aanu gaadhsiinay Madaxweynaha DDIS, kaasi oo runtii aad uga xumaaday goobtiina ku canaantay masuuliyiintii uu u xilsaaray protocolka aaska iyo soo dhawaynta madaxda Somaliland waxana uu iga codsaday in aan arrinka dhexgalo oon ka daba tago masuuliyiinta Somaliland, iyadoo uu I siiyay gaadhigiisii gaarka ahaa oo isaguna isku dayay inuu I soo raaco, balse boqolaal gaadhi oo dhinaca Somaliland u soo talaabayay ay na xanibeen, aakhirkiina waxa aniga, wasiirka Cadaalada SL iyo raxan wasiiro ah oo DDIS ka tirsan noo suuro gashay in aan Madaxweyne xigeenka JSL iyo Gudoomiye Muuse Biixi aanu ka qancino inay na raacaan, taasi oo aanu kulan isugu keenay Masuuliyiinta Somaliland iyo Madaxweynaha DDIS, halkaasi oo uu Madaxweyne Cabdi .Maxamuud Cumar ka raali geliyay Madaxweyne xigeenka JSL iyo gudmooyiha xisbilxaakimka dhacdadaasi, iyadoo ay Masuuliyiinta Somaliland u sheegeen in wax cadho la yidhaahdaa aanay jirin, balse farsamo dhinaca amniga ah maadaama ay kumanaan qof daba socdeen uga soo tallaabeen xadka, halkaasi oo masuuliyiinta Somaliland uga mahadnaqeen sida dareenka leh ee uu Mdaxweyne Cabdi Muxumed uga hawlgalay arrinta islamarkaasina uu ugu dhabar adaygay inaanu noqon isagoo la kulma madaxda Somaliland mooyee. Haddaba waxa taasi oo jirta danta labada dalna ay ku jirto xidhiidh ka. Wanaagsan ee.dhawaan dib u curtay shirkii Dirirdawe aanu kula soo yeelanay masuuliyiinta DDIS iyo kuwa Federalka Ethiopia, ayaa qaar aan qiimaynayn waxa dhaawac uu keeni karo warkoodu ay u dhigeen in la quydhsaday madaxdeena, halka kuwa quudhsiga iyo bahdilka keenaya ay tahay kuwa sidaa wax u turjumaya. Si kastaba ha ahaatee waxaan saaxiibadayda saxaafada ka codsanayaa inay warkaasi saxaan nalana ilaaliyaan xidhiidhka wanaagsan ee labada dhinac ka curtay, kaasi oo sababy in kooxihii nabada diidanaa ay arrintoodii soo afjaranto”. Ayuu qoraalkiisa ku soo xidhay Guddoomiyaha Gobolka Gabiley Mudane Mustafe Cabdi Ciise (Shiine).




Leave a Reply

Your email address will not be published. Required fields are marked *