Search

Ajandaha Shirka Labada Xisbi Mucaarad U Furmay iyo Magacyada Shir Guddoonka.

Hargeysa(Foore) – Shirka labada xisbi mucaarad ee Somaliland ayaa sabtida maanta si rasmi ah uga furmay Hotel Dalxiis ee ku yaala badhtamaha magaalada Hargeysa, kadib markii Khamiistii Maxakamadda Dastuuriga ah xayiraad xukumaddu saartay ka qaaday. Waxaa shirka ciwaan looga dhigay “Shirka wada jirka ah ee labada Xisbi Ucid iyo Waddani ee lagu qiimaynayo xaaladda wadanka”, waxaana meesha ka maqan doorkii madasha wada tashiga inkasta oo ay ka soo qayb galeen.

Shirka oo abaaro 11:00AM Saacadda Hargeysa ka furmay Hoolka shirarka Hotel Dalxiis, waxaa ka soo qayb galay hogaanka Xisbiga Mucaaradka ah ee Waddani oo uu ugu horeeyo Guddoomiye Cabdiraxmaan Maxamed Cabdillaahi Cirro, hogaanka xisbiga Ucid oo uu ugu horeeyo Eng Faysal Cali Waraabe, hogaanka Madasha wadatashiga oo ay hogaaminayaan Guddoomiye Xasan Guure Jaamac, Eng Maxamed Xaashi Cilmi iyo Mujaahid Xasan Ciise Jaamac, iyo waliba marti kale oo tiro badan.

Guddoomiyaha guddida shir guddoominaysa shirka Mucaaradka Aqoon yahan Cabdirashiid Xasan Mataan, ayaa sharaxay Ajandaha shirka waxaanu sheegay in lagu qiimaynayo arrimaha dalka ka taagan “Waxaa Lagaga hadli doonaa Sixir bararka, waxaa lagaga hadli doonaa Qiimaynta sharciga dalka, waxaa lagaga hadli doonaa hogaan la’aanta, waxaa lagaga hadli gadoonka siyaasadeed iyo qaddiyadda Somaliland, waxaa lagaga hadli xaaladda amniga, waxaa kale oo lagaga hadli doonaa arrimaha doorashooyinka,” ayuu yidhi Guddoomiyaha shirku.

Cabdirashiid waxa uu sheegay in shirku socon doono galinka dambe ee maanta, bari oo la filayo in la soo gabogabeeyo galinkiisa dambe, haddii kalena lagu dari doono maalin dheeraad ah.

Guddoomiyaha Xisbiga Mucaaradka ee Ucid Eng Faysal Cali Waraabe iyo Guddoomiyaha Waddani Cabdiraxmaan Cirro, ayaa furitaanka shirka ka hadlay waxayna sheegeen in kulanka laga filayo talooyin wax ku ool ah oo wax lagaga qabto arrimaha dalka, islamarkaana aanu noqon doonin mid cidna lagu bartilmaameedsanayo.

Magacyada Shir gudoonka Shirka
1. Cabdirashiid Xasan Mataan Guddoomiye
2. Maxamed Cismaan Yuusuf(Is-xal).
3. Cali Axmed Cabdiqaadir(Cantar)
4. Cabdiqaadir Yuusuf Cismaan(Qodax)
5. Maxamed Cabdillaahi Uurcadde
6. Xildhibaan Ibraahin Rayte.




Leave a Reply

Your email address will not be published. Required fields are marked *